Վաղաժամ ծննդաբերության, հղիության կրելախախտի եւ ոչ արհեստական վիժումների թիվը Հայաստանում նվազեցնելու նպատակով օրեր առաջ հայ մասնագետների մասնակցությամբ անցկացվեց գիտագործնական միջազգային գիտաժողով, որին ներկա էր ՌԴ—ից ժամանած մանկաբարձ—գինեկոլոգների ասոցիացիայի փոխնախագահ, պրոֆեսոր Վիկտոր Ռաձինսկին։ Գիտաժողովն անցկացվեց Հայաստանի մանկաբարձ—գինեկոլոգների եւ նեոնատոլոգների ասոցիացիայի, մանկաբարձությունում եւ գինեկոլոգիայում ուլտրաձայնային ախտորոշման հայկական ասոցիացիայի հետ համատեղ՝ ՀՀ առողջապահության նախարարության աջակցությամբ։

Մասնագետների վկայությամբ, Հայաստանում բարձր է ոչ արհեստական վիժումների թիվը, ուստի գիտաժողովը հնարավորություն կտա գնահատելու հղիությունների ընդհատումների առկա վիճակը եւ կօգնի ախտորոշման ու բուժման բարելավման նպատակով համապատասխան ուղեցույցների մշակմանը։

Մանկաբարձությունում եւ գինեկոլոգիայում ուլտրաձայնային ախտորոշման հայկական ասոցիացիայի նախագահ, բժշկական գիտությունների դոկտոր Կարինե Թոխունցը տեղեկացրեց, որ ծննդօգնության եւ վերարտադրողական առողջության խնդիրները մշտապես ՀՀ առողջապահության նախարարության ուշադրության կենտրոնում են, եւ կոնֆերանսը կազմակերպվել է առողջապահության նախարարի անմիջական հանձնարարությամբ՝ նվազեցնելու համար ինքնաբերաբար վիժումների քանակը։

Նրա խոսքերով, Հայաստանում բարձր է վիժումների ցուցանիշը եւ տարեկան հասնում է շուրջ 3.5 հազարի, սակայն դա դեռ ամբողջական թիվը չէ, քանի որ շատ վիժումներ պաշտոնապես չեն գրանցվում բժշկին չդիմելու պատճառով։

Ինչո՞ւ է այդ ցուցանիշը բարձր, ըստ Թոխունցի, այն պայմանավորված է գործիքային հետազոտություններից, լաբորատոր քննությունների արդյունքներից, ուստի անհրաժեշտ է մշակել միասնական գործելակերպ։
«Խնդիրը պահանջում է բազմաթիվ մասնագետների մասնակցությունը։ Հենց այդ պատճառով վիժումների եւ վաղաժամ ծննդաբերությունների կանխարգելմանը նվիրված գիտաժողովին հավաքվել են տարբեր ոլորտների ներկայացուցիչներ։ Գիտելիքի փոխանակումը կարող է նպաստել Հայաստանում ծննդօգնությունը նոր մակարդակի բարձրացնելու գործընթացին։ Վիժման ռիսկերը բացահայտելու համար անհրաժեշտ են ոչ միայն մանկաբարձ—գինեկոլոգի գիտելիքները, այլ նաեւ ճիշտ անցկացրած լաբորատոր եւ գործիքային հետազոտություններ։ Բոլոր այդ մասնագետների հետ համագործակցությունն ու նրանց մոտ ժամանակակից սարքավորումների առկայությունը արդիական գիտելիքների հետ միասին կարող է պակասեցնել Հայաստանում վիժումների քանակը»,–նշեց Կարինե Թոխունցը։

ՀՀ առողջապահության նախարարության գլխավոր մանկաբարձ—գինեկոլոգ Ռազմիկ Աբրահամյանի տեղեկացմամբ, վերջին տարիներին Հայաստանում էապես նվազել են մոր եւ մանկան մահացության դեպքերը, անպտղության ցուցանիշները, սակայն դեռ շատ խնդիրներ կան, որոնք կարիք ունեն ավելի խոր ուսումնասիրման։ Դրանց թվում կարեւոր տեղ են զբաղեցնում վիժումն ու վաղաժամ ծննդաբերությունը, կրելախախտը, որը 11 տոկոս է կազմում։

Մանկաբարձ—գինեկոլոգի խոսքով, դա այնքան էլ բարձր ցուցանիշ չէ, սակայն քիչ էլ չէ, քանի որ ժամկետից շուտ ծնված փոքրիկները կարող են խնդիրներ ունենալ եւ հատուկ խնամքի են ենթակա։ «Որքան նվազի վաղաժամ ծննդաբերության կամ կրելախախտի ցուցանիշը, այնքան շատ կունենանք առողջ մանուկներ»,–նշեց մասնագետը՝ հավելելով, որ նվազել է արհեստական ընդհատումների թիվը։ 30 հազարի փոխարեն նախորդ տարի գրանցվել է հղիության արհեստական ընդհատման 7 հազար դեպք։

Գիտաժողովի շրջանակներում անցկացվեց ուլտրաձայնային հետազոտության գործնական դասընթաց՝ բժիշկների հմտությունները կատարելագործելու եւ Հայաստանի առողջապահության համակարգում եվրոպական մեթոդաբանության վրա հիմնված ուլտրաձայնային հետազոտությունների ներդրման նպատակով։ Ռուսաստանի ժողովուրդների բարեկամության համալսարանի մանկաբարձության եւ գինեկոլոգիայի ամբիոնի վարիչ պրոֆեսոր Վիկտոր Ռաձինսկին, ով նույնպես հրավիրված էր գիտաժողովին, մի քանի դասախոսություն կարդաց եւ առաջին անգամ կիսեց իր փորձն ու գիտելիքները հայ մասնագետների հետ։

Ճանաչված գիտնական Վիկտոր Ռաձինսկին, ով ամբողջ գիտական դպրոցի հիմնադիր է, վերհանեց գինեկոլոգիական ու մանկաբարձության ոլորտում առկա խնդիրները։ Նրա դիտարկմամբ, վիժումները հիմնականում պայմանավորված են սոցիալական գործոնով։

«Առաջին հերթին պետք է բարելավել հղիների սոցիալական վիճակը եւ ուշադրություն դարձնել սննդին, որով պայմանավորված է նորածնի առողջ լինելու հանգամանքը։ Ամբողջ աշխարհում, գիտնականի մեջբերմամբ, վերջին տասը տարիներին էականորեն նվազել է մայրական մահացության ցուցանիշը, ինչը պայմանավորված է ոչ միայն բժիշկների մասնագիտական պատրաստվածությամբ, այլեւ կյանքի որակի փոփոխմամբ»,–նշեց Վ. Ռադզինսկին։

Գիտաժողովին մասնակցում էին մանկաբարձներ, գինեկոլոգներ, սոնոգրաֆիստներ եւ այլ մասնագետներ ոչ միայն Երեւանից, այլեւ ՀՀ մարզերից։

Լուսինե ՆԱԶԱՐՅԱՆ