Կոնկրետ ինչ-որ մեկին զանգահարելու ցանկությունը և նրա հետ զրույցի տևողությունը կախված է եղանակից, պարզել են Նյուքասլի (Մեծ Բրիտանիա) համալսարանի գիտնականները, որոնց եզրակացությունները հրապարակվել են PLOS ONE ամսագրում։

Վերլուծելով 1.3 միլիոն մարդու բջջային հեռախոսների զանգերը՝ հետազոտողները պարզել են, որ անբարենպաստ եղանակը (շոգ, խոնավ, տոթ կամ ցուրտ) երկարեցնում է զանգերի տևողությունը, սակայն կրճատում շփման շրջանակը։

Գիտնականները հիշեցնում են, որ մարդու տրամադրության, առողջության, ակտիվության վրա եղանակի ազդեցությունը վաղուց է հայտնի։ Սակայն հետազոտողները ենթադրել են, որ եղանակի փոփոխությունն ազդում է նաև բջջային հեռախոսից մարդու կախվածության վրա։

«Մենք պարզել ենք, որ անբարենպաստ եղանակային պայմաններում «որևէ մեկին զանգահարելու» մեր սովորույթը նվազում է, մենք ավելի շատ հեռախոսով խոսում ենք մտերիմ ընկերների կամ ընտանիքի անդամների, քան այլ մարդկանց հետ»,- նշել են գիտնականները։

Հետազոտությունն արվել է բջջային հեռախոս օգտագործող Պորտուգալիայի ավելի քան 1.3 միլիոն մարդու անանուն տվյալների հիման վրա։ Զանգի տևողության և վայրի տեղեկատվությունն օգտագործելով՝ գիտնականների խումբը բաժանել է նրանց երկու խմբի՝ ամուր սոցիալական կապեր և թույլ սոցիալական կապեր ունեցողների։